―171―
Jan, orang siapa lantaran koerang awas, poendaknja terkena itoe tendangan dan toeboenja djadi kadjengkang ka blakang.
Lou So Tjin goenaken ini koetika baek, lantas berlompat toeroen ka bawah randjang dan teroes memboeroe ka itoe tembok di mana ada tergantoeng itoe golok. Kombali Pang Jan menoesoek sama iapoenja sendjata, tapi kombali itoe prampoewan beroentoeng bisa kasi liwat dengen berkelit. Ini tersebab Lou So Tjin berada dalem iapoenja kamar sendiri, biar poen tida ada panerangan lampoe, tapi ia kenal baek keadahannja dalem itoe kamar. Maka ia soeda beroentoeng bisa dapet raba itoe golok jang lantas dihoenoes.
„Toeloeng. toeloeng, ada pemboenoeh !“ berseroeh ia sakeras-kerasnja.
Itoe boedjang-boedjang prampoean jang menoenggoein di loewar kamar, semoewanja telah denger soewara riboet-riboet dan gedeboekan di dalem kamar. Blakangan soewara seroehannja Lou So Tjin, iaorang tida bisa denger terang apa jang dimaksoedken. Oleh kerna itoe, iaorang djadi merasa heran, mengapa harian pertama kawin sadja soeda maoe memaen dengen saling] poekoel.
„Soedalah, nona, djangan bikin riboet,“ kata salah-satoe antaranja. „Hari pertama soeda begitoe, nanti kaloe orang loewar dapet taoe tentoe diboewat boewah tertawahan.
„Tjilaka, toeloeng! ada pemboenoeh !“ berseroeh lagi Lou So Tjin. „Hajo, lekasan kasi kabar pada Toaya.“
Orang tentoe aken persalahken Pang Jan terlaloe kaboeroe napsoe, mengapa ia tida maoe menoenggoe doeloe sampe itoe prampoewan tidoer poeles dan sampe ia bisa dapet tjoeri itoe
