dengen sabelah tangannja sembari berkata: "Lantaran kaoe kata 'gitoe, akoe sengadja tida maoe kasi kaoe liat sekarang!"
Tapi Pang Jan lantas berkelit, hingga tangannja itoe prampoewan genit tida bisa mengenaken iapoenja toeboe.
"Kaloe kaoe tida maoe kasi akoe liat," kata ia, "akoe poen tida maoe memaksa."
Djoestroe pada itoe waktoe, kadengaran soewaranja satoe boedjang prampoewan berkata dari sabelah loewar: "Sekarang soeda djam sapoeloeh, harep 'mba-mantoe soeka lantas masoek tidoer sadja."
"Ai, kiranja soeda malem," kata Pang Jan. "Soeda waktoenja moesti tidoer."
Lou So Tjin manggoetken kapala, kamoedian ia lantas melepasken semoewa barang perhiasannja jang ia pake. Ia ambil soetra idjo boewat menahan iapoenja ramboet jang soeda terlepas dari kondenja. Ia melepasken djoega iapoenja pakean loewar dan koen. Di itoe waktoe, ia kaliatannja djadi begitoe eilok dan menarik hati, terlebih lagi lantaran di bawahnja panerangan lampoe. Kaloe sadja boekan Pang Jan, jang berhati ketas seperti batoe, biar poen tadinja telah berniat memboenoe pada ini prampoewan, sampe pada itoe waktoe tentoe djadi loemer seperti saldjoe jang kena sinarnja matahari.
Kioe-bwee-sian-ho oendang Pang Jan naek doeloe ka atas pembaringan, tapi sabaliknja ia itoe oendang itoe prampoewan naek sadja doeloean. Tatkala baroe sadja Lou So Tjin rebahken badannja ka dalem pembaringan, Pang Jan lantas pademken semoewa lampoe jang berada di sitoe.
„E-eh! mengapa kaoe pademken semoewa panerangan?" menegor Lou So Tjin. „Akoe denger
