Heng Djoe Liong lantas balikin badannja dan lari. Tie Hoa mengoeber dari blakangnja. Itoe orang koeroes lantas berseroeh: „Hei, orang she Heng, kaoe poenja perboewatan membikin akoe djadi tida bisa pandang mata. Kaoe berdoewa ada soedara poetoesan peroet; tapi sekarang satoe kena tertangkep, jang satoe lagi maoe melariken diri. Taro kata kane bisa lolosken dari, kaoe bisa hidoep brapa tahon lagi? Saoepamanja kaoe orang poenja pakerdjahan bisa berhasil, kamoedian tentoe sama-sama mendapat djabatan tinggi dan menoenggang koeda besar jang bagoes; sekarang kaoe orang poenja pakerdjahan telah mendjadi gagal, toch saharoesnja moesti sama-sama hadepken kasoekeran dan sama-sama menerima binasa, dengen begitoe baroelah bisa diseboet laki-laki.”
Itoe waktoe Heng Djoe Liong masi teroes lari sembari berpikir.
„Eh, djangan lari; kaloe lari boekannja satoe laki-laki. Apalagi memangnja kaoe tida nanti bisa terlolos dari sini. Kaoe haroes taoe, sekalipoen sama sobat djoega, haroes sama-sama soesa, apa lagi kaoe orang berdoewa jang bersoedara dari satoe kandoengan.”
Itoe waktoe Heng Djoe Liong soeda lari sampe di bawah satoe pagar tembok dan djoestroe ia berniat lompat ka atas, tapi ia lantas oeroengken niatnja itoe lantaran mendenger omongannja Kok In Hoei jang sangat menjolok iapoenja pendengeran. Itoe waktoe djoega ia membanting kakinja dan mengelah napas.
„Ach, soedalah, akoe tida maoe lari,” kata ia. „Kaoe orang boleh dateng ka sini, maoe diboenoeh atawa di-iris-iris djoega, boleh menoeroet sabagimana kaoe orang soeka.”
