Mandanga pupuik si Umbuik, marantak tagak sakali, badan bak raso bayang-bayang, paluah lah mamanji-manji, darah lah manampi-nampi, alah kaluah-kaluah kasah, lah bak baluik kanai palang, lah bak ula kanai lokok, duduak nan tak tasanangkan, diguluangnyo sakali tanunnyo, bakato inyo ka amainyo, “Oi Amai joden di amai, amai ambiakkan denai parian, Amai unjuakkan juo labu, Amai uluakan juo golok, awakden ka pai mandi, indak tatangguang palak badan, indak tabedo kasak diri, awakden palak-palak miang, hati hanguih bukan alang-alang.” Birawari amai si Galang, diluncuakan parian di dindiang, diagiahkan labu aso-aso, diuluakan galeh perak. Bajalan si Galang Banyak, disandang parian di bahu, dijinjiang galuak jo tangan kida, dikapik labu di katiak. Lah sabanta inyo bajalan, tibo di tapi tabiang, lah tagak si Galang Banyak, tampak dek si Umbuik Mudo, awaknyo sadang di baliak aua, bapantun si Umbuik Mudo, “Cubadak dikapiang-kapiang Talatak di dalam buluah; Jan lamo tagak di tabiang Kok dibaok tabiang runtuah.” Mandanga kato nan bak kian, takajuik si Galang Banyak, dipandang hilia jo mudiak, diliek kiri jo kanan, surang tidak nan nampak, bajalan juo nan jadi. Bajalan inyo ka ayia, sarato tibo inyo di luak, diliek luak lah karuah, luak lah diharunyo, sumua lah dibundaknyo, maliek nan bak kian, lah bangih si Galang Banyak, lah maamun mancacek-cacek. “Anak mancacak anak mancacau, anak singiang-ngiang rimbo, anak dapek dalam samak , anak cenceng panaruhan, anak indak bapitunjuak, anak indak bapangajaran, luak awak dikaruahkannyo, sumua awak dikacaunyo.”
60
