Lah sudah bajawek salam, disimpuahkan lutuik nan duo, ditakuakan kapalo nan satu, mamintak maaf inyo ka guru, lalu bajalan hanyo lai.
Lah sarantang duo rantang, cukuik katigo rantang panjang, dakok basarang hampia, hampia dakok ka tibo, lah tibo di surau Tuanku Iman Mudo, bak itu inyo mualimnyo, kok tafsir jo fiqih, iyolah mantik jo makna, qur’an nan tigo puluah juih, dapek manyimaknyimak sajo.
Lah mangaji si Umbuik Mudo, banyaklah kitab nan takaji, banyaklah surek nan tabaco, banyaklah lagu nan dapek, hatinyo tarang nan bak suluah, kajinyo bak cando ayia lalu.
Lorong ka suaronyo, nyariang lai garuak lai, garuaknyo garuak manih, namun malagu si Umbuik Mudo, urang bajalan jadi baranti, buruang tabang jadi hinggok.
Dek lamo kalamoan, habih hari babilang pakan, habih pakan babilang bulan, habih bulan babilang tahun, cukuik katigo tahun papek, takana dek inyo ka babaliak, nan kumbali ka kampuangnyo, iyo ka ranah Kampuang Tibarau, mamintak izin inyo ka gurunyo, lalu bajalan hanyo lai.
Alah sarantang pajalanan, cukuik katigo rantang panjang, dakok hampia ka tibo, lah tibo inyo di rumah amainyo.
Urang Padang mamunta banang
Dipunta dilipek-lipek
Dilipek lalu dipaduo;
Kalau dirantang inyo panjang
Elok dikumpua naknyo singkek
Diambiak sajo nan paguno.
