Kayu kalek tumbuah di tabiang Baurek babaniah tidak; Ubek jauah panyakik hampiang Panawa sasuai tidak. Lah sapakan inyo sakik, lah duo pakan antaronyo, lah payah si Galang Banyak, lah kaluah-kaluah kasah, hari itu hari Jum’at, sadang bunta bayang-bayang, sadang langang urang di kampuang, sadang rami urang di balai, bakato si Galang Banyak, “Oi Bapak joden di bapak, oi Mandeh joden di mandeh, iman denai alah bakucak, lah lamah sagalo sandi tulang, raso kan sampai ajalullah, nan punyo lah datang manjapuik, bari maaf denai di Bapak, bari ampun denai di Mandeh, rilahkan jariah payah Bapak, rilahkan ayia susu Mandeh, jawek salam di nan tingga, denai bajalan hanyo lai.” Mandanga kato nan bak kian, banduanglah ratok bapak mandehnyo, mahampeh-hampehkan diri, malacuik-lacuikkan badan, maruntun-runtunkan abuak, ka baa pulo leh lai. Tapanuli kota Siantar Pandan malilik Panyabuangan; Nyawo putuih badan talantar Arwah mangirap ka junjuangan. Lah mati si Galang Banyak, di hari nan sahari nantun, amainyo lah bagilo-gilo, lupo dunia di hari nantun, lah bakuruang masuak biliak. Lah diguguah tabuah jo canang, urang bahimpun kasadonyo, gadang ketek tuo mudo, laki-laki parampuan, cukuik jo Imam dangan Katik, rapek papek kasadonyo, allahu rabbi banyaknyo urang. “Tak tamuek di daun taleh Di daun taruang lah panuah pulo; Tak tamuek dinan laweh Di nan lakuang lah panuah pulo. Mancaliak si Galang Banyak, manjanguak mayik nan gadih. 108
