SI NONA MERAH......
85
Di tempat jang hawanja njaman, Ang Hwa seperti boenga jang dapet hawa baek dan rawatan apik, hingga selaennja ia keliatan seger poen tambah eilok.
Lien dan Ang Hwa idoep akoer betoel, tidoer satoe randjang, makan satoe medja, kamana sadja Lien Nio pergi, Ang Hwa moesti toeroet.
Pengidoepan jang tentrem ini sajang tida berdjalan lama, kerna satelah Ang Hwa beroesia 15 tahon, Ong Oe Loei jang baek hati telah meninggal doenia.
Sekarang njonja Roesoeh jang menahan rasa bentjinja seperti bendoengan aer petjah dan pada soeatoe hari panggil itoe gadis, seraja dengen bengis ia memerentah boeat Ang Hwa moelai dari djam 5 pagi sampe malem teroes-meneroes bekerdja. Bebrapa boedjang sengadja oleh njonja Roesoeh dibrentiken, hingga Ang Hwa djadi kaoeroek pakerdjahan boekan maen banjaknja.
Bebrapa kali Lien Nio madjoeken „protest”, tapi itoe semoea dipesoet di telapakan kakinja njonja djoedes itoe.
Doea tahon lamanja Ang Hwa idoep dalem seksaan, tapi anak gadis ini menerima nasibnja dengen sabar.
Pada tahon ketiga ia mendjadi sedih sekali, koetika Lien Nio dipisahken dari ianja, kerna Lien Nio dipaksa menikah sama satoe bandot toea jang banjak hartanja.
Njonja Roesoeh tida perdoeliken anaknja soeka atawa tida dan kamaoeannja mendjadi wet.
Tiga boelan kamoedian dengen terkedjoet Ang Hwa dapet kabar Lien Nio telah boenoch diri, lantaran tida merasa broentoeng idoep di dampingnja kake-kake jang poenja napsoe sexueel boeroek dan memaksa Lien boeat lakoeken perboeatan jang bisa meroesak kasehatannja sendiri. Djika ia tida maoe,