SI NONA MERAH......
83
nja....... jalah baboe Mina!"
„Baboe?...... bapa loe djadi kawin lagi sama boe....... Ha...... ha...... ha......!"
„Boekan, 'ntji! Saja poenja bapa soedah lama mati dan dia pinter ngobatin orang!" menjaoet Ang Hwa jang anggep sinshe A Lioeng mendjadi ajahnja.
„Pinter bikin obat...... kok mati djoega!" mendjengekin Ping Nio jang memang pinter omong, tapi bodoh dalem peladjarannja. Oemoernja ini anak soedah 12 tahon, tapi kalah sama Ang Hwa jang itoe waktoe oesianja antara 8 dan 9 tahon.
Saorang anak prempoean laen jang diseboet si Pitjis dan tida koerang djoedesnja laloe menghamperin doea anak jang sedeng bertjakepan itoe dan laloe berkata: „Boeat apa omong sama anak h a r a m d j a d a h !"
„Haramdjadah itoe apa, 'ntji?" menanja Ang Hwa dengen sabar.
„Anak jang tida karoean bapanja. Tjoba kaloe betoel poenja bapa, loe bisa seboet namanja!"
„Namanja sinshe!"
„Ha, apa betoel atawa tida goea bilang loe anak haramdjadah, masa bapa loe namanja sinshe!"
Ang Hwa pada itoe hari dengen menangis tjerita- ken pengalamannja pada Mina jang laloe menghiboer: „Ah, djangan soeka dengerin anak nakal poenja moeloet iseng. Bilang sadja namanja papa Tan A Lioeng!"
Besok pagi katerangan dari Ang Hwa timboelken boeah tertawaannja anak-anak djahat itoe jang laloe mengedjek: „Pantes, dia kaja anak singkhe, poetihnja djoega kaja poetih singkhe!"
Lien Nio bikin abis itoe edjekan-edjekan dengen toentoen Ang Hwa kaloear dari kalangan anak-anak djoedes itoe.
