„Sst. . . . . . . djangan kata begitoe, joo!” berkata Mina dengen moeka poetjet.
„Ah, boeat apa goea seboet boedi-boedi jang dilepas, kaloe loe tida katerlaloean p i k o e n. Ha. . . . . . .ha. . . . . . .hi. . . . . . .hi. . . . . . .hi. . . . . . .”
„Djangan bitjara terlaloe keras, nanti Neng Ang Hwa bangoen!” berkata Mina sembari maoe menoedjoe ka ajoenan.
„Neng Ang Hwa? Oh, djadi ada poetri semboenji dalem ini roemah. Oeah, kabetoelan sekali. Tanggoeng loe goea persen seringgit lagi....... . . . . . .!” menggoda Ban Pwee jang mengira itoe roemah ada roemah pelatjoeran.
Mina teroes masoek dan laloe kaloear dengen emban Ang Hwa.
„He, anak siapa in?” menanja Ban Pwee. Anaknja joo Hing!”
„Oh, kaloe begitoe ini anak goea djoega, boekan? Mana joo Hing?”
„Joo Hing soedah meninggal doenia,” menjaoet Mina sambil melele aer matanja.
Saorang jang poenja sedikit sadja prikamanoesiaan aken merasa piloe di hati meliat semoea ini, tapi dasar badjingan, ia boekan sadja tida sedih, tapi ketawa besar dan berkata: „Oh, ini joo Hing-tjilik dan goea papanja? Ha. . . . . . .ha. . . . . . .ha. . . . . . . pinter betoel Baron Han semboeniken tjoetjoenja di sini, soepaja ini resia tida diketahoei orang.”
„Ja, ini semoea gara-gara joo!” begitoe Mina menjataken penjeselannja.
„Dan jang djadi biang kladinja adalah djoestroe orang jang baroesan omong!” menjaoet Ban Pwee jang pinter bitjara.
Tjoba ia dapet didikan dan peladjaran baek, moengkin Ban Pwee bisa mendjadi advocaat.