Malem owe soedah dipapak sama Hing!"
Ban Lok manggoetken kepalanja, sedeng Njonja Inten menoebroek badannja Baron Han sembari... menangis seperti anak ketjil.
Dengen perlahan Ban Lok toentoen Elly keloear boeat biarken soeami-istri itoe berdjoempah, sasoe-dah sekean lama marika seperti terasing satoe sama laen.
Betoel sadja sorenja sasoedah Baron Han bikin testament, ia telah meninggal doenia dengen senjoe-man di bibir dan kata-kata jang pengabisan adalah: „Ja, Hing... papa ikoet Hing...!”
Lahirnja Ang Hwa telah disamboet dengen girang oleh Njonja Gwan dan Hing Nio.
Djoega banjak tetangga pada menjataken toeroet girang dengen memberi „tjeumpal” kata orang Soenda, ialah potongan tjita-tjita jang biasa dipake boeat djabang baji.
Hing Nio merasa sanget terharoe meliat kabaekannja para kenalan Njonja Gwan, dan saben kali orang membri apa-apa, ia keloear aer mata.
Ia inget keadaan di roemahnja sendiri. Tjoba ia menikah dengen orang baek-baek dan mempoenjai anak, betapa besar perhatian sanak-familienja.
Ia tida marah sama Ban Pwee jang mendjadi gara-gara, tapi ia merasa menjesel Ban Pwee tinggalken ia satengah djalan.
Mina jang dapet menjelami djiwanja Hing Nio merasa kasian dan sedapet-dapetnja ia membri hiboeran.
Sasoedah Ang Hwa beroesia satoe boelan telah terdjadi hal jang tida terdoega.