SI NONA MERAH
35
Ban Lok seringkali beriken nasehat pada Njonja Inten boeat brentiken perdjoediannja dan inget pada soeaminja jang makin lama makin koeroes dan poetjet serta omongannja tida karoean.
„Ah, orang sakit abis maoe dibegimana-in, engko!” berkata Njonja Inten. „Toch soedah ada Elly jang rawat. Maoe apa lagi?”
„Apa loe saben hari tida tengokin Han boeat beberap menit sadja?”
„Saja boekan dokter, engko! Tengok... tengok orang gila. Biar dia mampoes, 'ngga djadi apa!”
„Loe ada satoe bini jang edan kartoe!” berseroe Ban Lok jang djadi goesar pada soedaranja.
„Salahnja sendiri! Kenapa dia moesti pikirin si anak sial-dangkal, Hing! Saja taoe segala kasialan itoe pokonja dari anak asoe itoe. Doekoen bilang saja selaloe dapet rintangan dari orang jang dilahirken dari peroet saja. Tentoe tida laen daripada si asoe, kirik (anak andjing), prawan soendel...”
„Stop... loe djangan memaki kalang kaboet anak sendiri. Itoe tida baek!”
„Abis engko maoe apa?” membentak sang soedara.
„Goea minta loe perhatiken kasehatan soeamimoe!”
„Boleh besok, sekarang tida bisa. Soedah ditoenggoein orang!”
„Orang jang maoe kasi kaoentoengan besar?” mengedjek Ban Lok.
„Ah, lelaki taoe apa. Njonja Solo dateng lagi dan ini hari saja maoe poekoel betoel-betoel, biar dia trindil kaja ajam jang dibaboeti boeloenja.”
„Oh, bagoes! Bagoes! Ande kata loe menang seratoes riboe, oeah, tentoe loe seneng hati, ja?”
„Engko ini lagi dongeng,” menjaoet Njonja Inten dengen ketawa. „Siapa jang 'ngga seneng orang me-
