Sinshe A Lioeng itoeng-itoeng dengen djeridjinja tapi kamoedian tinggal diam.
Dalem hatinja timboel perasaan aneh, tapi ia tida menjataken dan laloe meninggalken njonja Gwan. Doeloe ia pernah ketemoe sama nona-mantoe ini, jalah waktoe baroe Ay Lok menikah, tapi itoe waktoe si nona-mantoe berbadan gemoek, sekarang kenapa djadi ketjil. Ja, perkara gemoek dan koeroes bisa kedjadian. Tapi orang pendek tida bisa djangkoeng, sebab manoesia boekan karet jang melar. Nona-mantoe doeloe pendek, Hing Nio djoestroe tinggi ketjil.
Sinshe tjoeriga. Moengkin Hing Nio boekan mantoenja njonja Gwan, atawa kaloe bener ada mantoenja, nona-mantoe ini moesti djalan serong. la dasarken karagoeannja dari alesan begini: „Kaloe Ay Lok soeda mati satoe tahon lamanja, Hing Nio tentoe boekan masih boenting, tapi soedah melahirken anak. Tentoe nona-mantoe mengandoeng boekan anaknja Ay Lok dan boeat toetoep maloe, djadi sekarang dengen sendirinja maoe tinggal di Bandoeng toeroet sama mama-mertoea.”
Tapi maskipoen ia bisa mengoesoet hal ini, sinshe A Lioeng tida soeka bikin renggang perhoeboengan jang manis antara nona-mantoe dan mama-mertoea.
Apalagi kaloe ia liat parasnja Hing Nio jang begitoe alim, ia tida pertjaja Hing Nio ada saorang prempoean jang tingkah-lakoenja boesoek, tapi ia lebih pertjaja Hing Nio telah terpikat oleh lelaki boesoek jang sasoedah menodaken namanja Hing Nio, lantes tida maoe pikoel risico. Tebakannja sinshe A Lioeng ada djitoe, katjoeali ia tida bisa merabah-rabah, bahoea Hing Nio boekan kasiken kahormatannja sama sembarang lelaki, sasoedah „soeaminja” mati.
ᛡ
