SI NONA MERAH......
29
Roemahnja sinshe A Lioeng djoega sama matjem-nja seperti roemah njonja Gwan jang sewahannja tjoema f 4.―saboelan. Waktoe itoe segala apa masih moerah dan hawa Bandoeng lebih dingin dari sekarang jang makin lama makin padet pendoedoeknja.
Hing Nio merasa senang tinggal dalem roemah jang saderhana itoe.
Perlahan dengen perlahan ia mengatahoei, bahoea njonja Gwan melaenken poenja satoe anak lelaki, jalah Tjan Ay Lok.
Pemoeda ini bekerdja pada seboeah toko di Soerabaia dan menikah sama saorang gadis miskin disana. Satelah Ay Lok meninggal tida kadengeran kabar-tjeritanja lagi dengen istri itoe. Tida heran, kaloe njonja Gwan djadi sanget girang, bahoea nona- mantoenja masih inget pada „mertoeanja".
Kabar mantoe Soerabaia dateng, oleh entjim Gwan disiarken kanan-kiri sebagi kebanggaan, Banjak kenalan entjim ini menjambangin Hing Nio dan oeroek Hing Nio dengen roepa-roepa pertanjaan tentang keadaan di Soerabaia.
Meliat Hing Nio jang bisa timboelken welas-asih orang, banjak tetangga dan kenalan njonja Gwan anterin makanan boeat Hing Nio jang katanja perloe banjak makan, biar anak dalem peroet itoe koeat.
Hing Nio terharoe meliat orang-orang prempoean begitoe manis boedi.
Perhatian dari sinshe A Lioeng ada besar. sekali.
Koetika boeat pertama kali sinshe A Lioeng meliat Hing Nio, nona moeda itoe laloe menjodja.
„Nonang datang dali mana?" menanja sinshe itoe. „Dari Soerabaia, sinshe!"
„Oh, Soe-lie-boa, ja....... goea joega soeta taoe tinggang disana sha-ni, hoo!"
Sinshe A Lioeng betoelken katja-matanja jang
