noeroet keadaan.
Sebentar girang, sebentar marah, sebentar sedih, sebentar bisa hiboerin orang.
Njonja Gwan sasoedah bertjakep-tjakepan sebentaran lagi, laloe poelang.
Eigenaar hotel rada bingoeng, koetika dikasi taoe pernahnja familie itoe oleh njonja Gwan, kerna ini ada bertentangan sama keterangannja Mina, tapi kerna ia pikir tida perloe tjampoer oeroesan jang tida menjangkoet dirinja, maka ia tinggal diam.
Besok paginja Mina dan Hing Nio pindah dari hotel ka Tjirojom.
„Doeloe...... kira-kira satoe tahon jang laloe, memang mama dikasi taoe sama si Ay Lok jang dia soedah kawin sama nona Soerabaia. Waktoe itoe mama sakit keras, djadi tida bisa dateng. Abis kawin, dia bawa nona-mantoe kemari, tapi ma'loem mama sakitnja keras, djadi mata rada lamoer, tida bisa liat terang. Satoe boelan si Ay Lok toengkoelin mama dan nio masih belon baek betoel, maskipoen soedah banjak mendingan, Lantaran dia djadi koeli orang, tentoe tida bisa teroes-teroesan perlop, maka dia poelang ka Soerabaia dengen nona-mantoe. Di seblah roemah nio ada tinggal sinshe A Lioeng. Orangnja keliwat baek, mama makan obatnja, 'ngga taoe bajar dan dia sanggoep semboehken mama dan bilang sama si Ay Lok, jang dia djangan koeatir. Bahaja besar soedah liwat, boleh si Ay Lok poelang ka Soerabaia."
Roemahnja njonja Gwan itoe dari bilik dengan dimoeka pake papan-papan jang diseboet di Preangan „ t a n g k e b a n " atau di Djawa Timoer „ b e e d a k ".