26
TJILIK-ROMAN'S
naken ketjerdasannja aken menjesoeaiken keadaan. laloe berkata: „Betoel, njonja belon kenal, tapi sebenernja ini ada njonja poenja familie sendiri. Tjoba, njonja inget-inget apa tida poenja familie di Soerabaia?"
„Di Soerabaia? Ja...... ja...... doeloe sekali goea pernah trima soerat dari goea poenja anak jang soedah kawin sama nona Soerabaia. Blakangan goea denger anak goea soedah mati, tapi goea tida dapet kabar satoe apa lagi. Apakah nona ini entjim poenja mantoe?"
Ia lama mengawasin Hing Nio.
Sakoenjoeng-koenjoeng njonja toea itoe memeloek Hing Nio sembari menangis. Hing Nio tambah bingoeng, kerna ia koeatir berhadepan sama orang jang koerang beres ingetannja.
„Ai, si Ay Lok soeda mati.. tapi sekarang ada bininja. O, nona mantoe.. !" (Di Djawa Barat ada kebiasaan mertoea panggil mantoenja „nona-man-toe").
Hing Nio jang mendadak dipaksa pegang rol „nona-mantoe" maoe atawa tida maoe moesti trima itoe. kerna ia inget pesenannja Mina, bahoea sekali djoesta haroes itoe dipertahanken dengen laen kedjoestaan.
„Apa nona-mantoe soedah makan?" menanja entjim Gwan satelah lepas pelokannja. Djoega ini ada satoe kebiasaan di Djawa Barat boeat menanja begitoe pada orang jang baroe dateng.
Njonja Gwan pesoet aer matanja dengen oedjoeng angkinnja jang djoega biasa lipake boeat pesoet bibirnja jang penoeh dengen sirih.
„Soedah, mama!" menjaoet Hing Nio dengen perlahan.
„Soekoerlah...... ai... si Ay Lok djadi mati soenggoean. Dia sakit apa, nona-mantoe?"
