14
TJILIK-ROMAN'S
Hing Nio pasrah sadja atas labidjaksanaannja Mina. Di dalem kreta-api ia mengoetjoerken banjak aer mata, sahingga dengen perasaan piloe Mina memberi hiboeran: „Djangan joo nangis sadja! Mata bisa roesak!"
„Ah, Mina, kaoe poenja pikiran soenggoeh tida tetep," berkata Hing Nio. „Doeloe kaoe andjoerken boeat bikin goegoer kandoengankoe, sekarang kaoe mentjegah akoe boenoeh diri meloeloe lantaran kasian pada anak dalem ini peroet!"
Oentoeng dalem wagon jang ditoempangin Hing Nio ada klas II dan boleh dikataken kosong, hingga pertjakepan ini tida kedengeran oleh orang jang tida perloe taoe itoe resia.
Mina tarik napas pandjang seraja menjaoet: „Ja, joo, saja djoega merasa heran bagimana lekas berobah pikiran saja. Boleh djadi semoea manoesia soeka begitoe. Apa jang ia doeloe pikir baek, djangan kata soedah liwat bebrapa boelan, besok paginja soedah bisa dianggep itoe pikiran koerang baek dan loesa malahan tida baek. Meliat joo poenja keadaan saja berpikir, jang saja poen toeroet tanggoeng dosa, maka marilah kita bersama-sama memikoel itoe tanggoengan."
Soepaja tida kentara Hing Nio berpakean priboemi, dengen kroedoeng dan slendang soetra. Ini semoea Mina jang mengatoer.
Samentara itoe bagimana ilangnja Hing Nio disamboet diroemahnja Baron Han?
Betoel seperti didoegah lebih doeloe oleh Mina. Baron Han merasa menjesel atas tindakannja jang terlaloe kedjem terhadep anak satoe-satoenja.
la menghamperi dengen perlahan kamarnja Hing Nio dan alangkah terkedjoetnja, satelah mengetahoei pintoe kamar itoe terpentang lebar. Ia liat ratjoen, sendjata tadjem dan tambang masih terletak di me-
