Doea orang itoe satelah meninggalken gedong itoe djalan tersipoe-sipoe. Ternjata marika ada doea orang prempoean, antaranja satoe keliatan masih moeda dan berbadan doea. Ia boekan laen daripada Hing Nio jang merat bersama baboe Mina. Sebab-sebabnja marika diwaktoe keadaan masih gelap goelita keloear dari itoe gedong, pembatja soedah mengetahoei dari fatsal pertama dari ini tjerita.
Maskipoen Soerabaia terkenal sebagi kota panas, pada itoe pagi rasanja hawa ada dingin. Hing Nio jang tida biasa djalan kaki djaoeh, sabentaran sadja soedah merasa tjape.
Mina taoe itoe, maka ia menghiboer: „Sabentar lagi kita sampe di station, joo! Tjoba ada dokar, kita kates naek, Roepanja kita keloear terlaloe pagi."
Sabenernja djoega koetika marika sampe di station kreta-api, lontjeng mengoendjoek djam 4 pagi. Lapangan station masih sepi.
Kreta-api ka djoeroesan Djokja masih lama brang- katnja, maka loket boeat djoeal kartjis poen masih tertoetoep.
Hing Nio jang kadinginan, ditambah rasa takoet dan maloe, toendoekken kepalanja.
Satelah temponja orang membeli kartjis dateng. Mina laloe beli kartjis boeat Djokja.
Kemoedian ia toentoen madjikannja masoek ka perron dan naek kreta-api jang brangkat paling pagi ka djoeroesan Djawa Barat.
Kenapa Mina adjak madjikannja ka D j o k j a?
Toedjoean jang betoel adalah Bandoeng, di tempat mana Hing Nio asing sama sekali.
Tapi Mina koeatir Hing Nio keliwat tjape doedoek satoe hari dalem kreta-api, maka perdjalanan itoe dibikin doea hari. Di Djokja ia kebetoelan ada poenja familie jang baek dan kasitoe ia maoe bawa itoe nona.