124
TJILIK-ROMAN'S
„Oh, Tjhie-heng, akoe minta soepaja kaoe dan ini soedara Satrio, soeka boeat samentara hari tinggal di sini sebagi penghormatan dari kaloeargakoe atas kaoe-berdoea poenja boedi jang begitoe besar. . . . . . .” meminta Tek-gwat jang berbareng dengen itoe, isterinja Tek-gwat, njonja Siong-nio dan poeterinja, nona Siok-nio, sama kaloear dan mengadep pada ’ntjek Tjhie Kha-louw, mendjoerah menghatoerken terima kasihnja.
„Hah, djangan kaoe-orang berlakoe begini roepa di hadepankoe! Menjesel sekali akoe tida bisa terima oendanganmoe boeat akoe dan Satrio diberi penghormatan begitoe besar. Laginja, memang akoe tida bisa tinggal terlaloe lama di sesoeatoe tempat, kerna kaoe tentoe mengerti sendiri, akibat bagimana kaloe akoe tida saben-saben lontjat ka sana ka mari boeat hindarken. . . . . . . bahaja-pembalesan dari marika jang perna akoe satronin boeat marika poenja perboeatan-perboeatan djahat! Itoelah sebabnja, akoe harep kaoe orang tida djadi ketjil hati.”
Achirnja dengen perasaan apa-boleh-boeat Tek gwat dan kaloearganja tida bisa menahan lebih djaoeh, tjoema ia minta soepaja kadoea penoeloeng itoe soeka aken sabentar nanti makan bersama-sama selakoe perdjamoean selamet djalan bocat 'ntjek Tjhie Kha-louw.
Dan dalem perdjamoean, antara laen-laen Tek gwat berkata: „Tjhie-heng, akoe berikoet isteri dan anak-prampoeankoe, tida bisa membales kaoe poenja boedi jang begitoe besar, maka sebagi tanda-katjintaan, akoe mohon soedilah apa kiranja kaoe soeka