Halaman ini tervalidasi
PENDEKAR ,,DJIKALO’’
121
Boeat menjegah meloeasnja kaoe poenja perboeatan-perboeatan kedji, maka sengadja akoe ,,gorok’’ (boekan kaoe jang bisa ,,gorok’’ padakoe seperti itoe ada diniat olehmoe!) kaoe di medja paykioe baroesan, dimana kaoe poenja oeang sebanjak k.l. f 10.000.- telah berada dalem tangankoe, berikoet djoega bebrapa djenis barang berharga tida koerang dari f 5.000.- Ini semoea djangan kaoe anggep aken akoe telen, malah sapeser poen akoe tida kasoedian katelak oeangmoe. Djoemblah itoe sa-anteronja akoe nanti serahken pada badan-badan amal, teroetama jang perloe, jalah badan-badan pengoengsian, dalem mana ada sanget diboetoehken sokongan-sokongan dari tongpao kita seloeroehnja, maka akoe talangin kaoe, saorang hartawan terkenal di ini kota, boeat djoega beriken sokongan jang tida terlaloe besar artinja.
Inget baek-baek, bahoea kaoe poenja tipoe kedji singkirken sianseng Tek-gwat akoe djoega soedah taoe dan sekarang sedeng akoe prentah orang boeat tjari padanja agar bisa lekas kombali berkoempoel lagi bersama anak-isterinja. Djoega perhatiken, djangan sekali lagi kaoe berani mengganggoe anak- bini orang, teroetama poeterinja Tek-gwat jang berada dibawah perlindoengankoe.
Soeatoe pesanan jang haroes di-inget selama hidoepmoe, jalah moelai dari sekarang kaoe haroes robah semoea perboeatanmoe itoe dan goenakenlah kekajaanme di atas djalanan jang selaras dan bisa bermanfaat bagi sesamanja!
Apabila peringetan dan pesenan ini masih djoega tida kaoe perhatiken, djangan kaoe nanti menjesel kaloe jang bertanda dibawah ini ambil tindakan lebih keras daripada sekarang kaoe alamken!. . . . . . .Tjhie Kha-louw.’’
