120
TJILIK-ROMAN'S
Ia jang mengerti djoega tjoekoep baek bahasa Tionghoa, dengen gampang bisa mengerti boenjinja itoe soerat jang antara laen ada diseboet demikian:
„Sianseng Bo-tjay!
Memang soedah sedari lama akoe telah taoe kaoe poenja kadjahatan dan kaoe poenja harta kakajaan jang kaoe toempoek di dalem lemari besimoe, poen akoe soedah mengetahoei, itoe didapet olehmoe dari pakerdjahan jang tida halal.
Kaoe sebagi soedagar jang kedji, tida ada sedikitpoen perasaanmoe jang berkasian kepada sesamanja bangsa sendiri jang mendjadi korban pengatjau-pengatjau. Dengen tida soengkan-soengkan kaoe tanggapin barang-barang gedoran asal dari perampokan-perampokan milik bangsa sendiri, kamoedian kaoe djoeal itoe dengen harga tjatoet loear biasa besar kaoentoengannja!
Sebagi hartawan, kaoe sedikitpoen tida perna inget atas nasib jang begitoe menjedihken dari tongpao kita jang mendjadi sengsara tersebab terbitnja kekatjauan-kekatjauan pada masa sekarang ini. Sanget pelit adanja kaoe boeat kaloearken sokongan-sokongan jang diboetoehken oleh badan-badan amal, dalem mana nasib tongpao kita jang sengsara itoe ada terpikoel. Sebaliknja kaoe begitoe seneng dan tida sajang-sajang hamboerken oeangmoe boeat poeasken napsoe kedjinja dengen mempermaenken kasoetjiannja kaoem wanita bangsa kita, seperti paling belakang kaoe poen tjoba maoe paksa ambil nona Siok-nio boeat djadi kaoe poenja bini-moeda jang kalima!