gigit djanggoetnja Ban Pwee.
Ang Hwa kamekmek satelah meliat Ban Pwee berloemoeran darah.
Andjing itoe soedah mendjadi kalap dan menggigit disana-sini hingga Ban Pwee tergoeling di djoebin dan mendjerit-djerit.
Ang Hwa laloe tjoba memisahken itoe andjing dari ajahnja, tapi soesah sekali, kerna binatang dan manoesia itoe soedah kaliatan seperti mendjadi rapet satoe sama laen.
Ang Hwa ambil bangkoe dan lemparken pada kepalanja Bruno, hingga itoe andjing lepasken gigitannja pada Ban Pwee dan djatoh pangsan.
Ban Pwee jang moekanja penoeh tjakaran koekoenja Bruno dan lehernja mengaloearken darah, tida bisa bangoen.
Ditengah-tengah itoe kariboetan. . . . . . . laloe Kong Liang moentjoel.
Ini pamoeda ditengah djalan dapet karoesakan auto dan sasoedah ia bikin betoel sendiri, itoe auto djalan doea km. lagi, lantes mandek poela dan sekali ini auto itoe lantaran slip, masoek solokan.
Dengen perasaan mendongkel, achirnja ia kombali ka villanja dengen tinggalken itoe auto disitoe boeat nanti didjoempoet monteur.
Ia tida kira poelang ka roemah nampak itoe drama.
Ban Pwee mengaloearken terlaloe banjak darah, hingga kaliatannja lemes sekali.
Kong Liang sigra boeroe-boeroe pergi ka kantoor katjamatan jang terdeket dan telefoon pada dokter dari Tjiandjoer boeat lekas beriken pertoeloengan.
Dengen menangis Ang Hwa tempelken kepalanja di dadanja Kong Liang.
Tinah toetoerken kedjadian jang tida terdoegah itoe.