elok parangai rancak, ruponyo mudo romannyo elok, budi baiak tahu di untuang, bana inyo urang miskin, basawah sadang dimakan, tapi indak kaluah kasah, pandai hiduik jo mandehnyo, bayang-bayang sapanjang badan.”
Mandanga kato nan bak kian, tagalak mamak si Ranti, “Kalau itu carian Pakiah, samo sapaham malah kito, samo sacari malah awak, mukasuik ambo itu juo, itu anak nan elok laku, baameh di ujuang jari, pandai manggaleh tangah pakan, kini bakadai di Padang, elok nan masak kito juluak, ditingkek janjang ditapiak bandua, dibaok siriah dalam uncang.”
Mandanga kato nan bak kian, sanang hati mandeh si Ranti, sajuak pikiran maso itu, dicari manti nan piawai, nan pandai barundiang kieh bandiang, urang arif bijaksano, muluik manih kucindan murah.
Kan iyo hari barisuak, dihimbau manti nan piawai, iyo uniang si Sariamin, dituruik rumah si Sariamin, urang biaso jadi manti, pandai batutua jo barundiang, lagi arif bijaksana, urang panamuah elok laku, kasayangan urang dalam kampuang, cadiak nan bukan alang-alang.
Lah bajalan si Sariamin, diibaok siriah dalam kampia, dituruikkan labuah nan panjang, ado sarantang pajalanan, cukuik kaduo rantang panjang, nan jauah batambah dakek juo, hampia ka tibo hanyo lai, lan tampak rumah Siti Rawani.
Dek untuang elok palangkahan, batamu ruweh jo buku, lah tampak si Bujang Saman, sadang tagak di laman, ruponyo inyo pulang dari Padang, sanan bakato si Sariamin, “Bilo Buyuang datang dari Padang?”
Manjawab si Bujang Saman, “Kapatang ambo pulang, naiaklah Mandeh ka rumah.”
Mandanga suaro si Sariamin, manjanguah Siti Rawani, bakato sadang bapantun,
18
