Halaman:Sam Bin Tjoe Gie.pdf/11

Dari Wikisumber bahasa Indonesia, perpustakaan bebas
Halaman ini tervalidasi

—9—

Lebih djaoe, baek kita bitjaraken tentang asal-oesoelnja bangsa. Menoesia berasal dari binatang, tapi ia terpisa djaoe dari binatang bersajap dan binatang kaki doea; ia ada „soekmanja pekerdja'an Alam”. Bermoelah menoesia terbagi djadi lima bangsa jang besar, jaitoe poeti, item, merah, koening dan tjoklat. Kaloe kita bagi lebih djaoe, kita dapetken berbagi-bagi bangsa ketjilan, seperti itoe bangsa-bangsa jang tinggal dibinoea Asia, jaitoe bangsa Mongool, Melajoe, Japan, Boantjioe, dan Tionghoa. Itoe berbagi-bagi tenaga jang bikin marika hidoep dengen membesarken jalah tenaga alam, tapi kaloe kita tjoba-tjoba petjaken itoe berbagi-bagi tenaga kita aken dapetken jang itoe ada roewet. Tenaga jang paling besar artinja jalah persama'an darah. Bangsa Tionghoa terhitoeng bangsa koelit koening kerna marika poenja leloehoer ada bangsa jang berkoelit koening. Darahnja marika poenja leloehoer mengalir toeroen-menoeroen dan telah tjiptaken iketan jang koeat dari persama'an darah.

Tenaga kadoea jalah penghidoepan; dan kapan tjara hidoep berlaenan, djadinja besarnja berbagi-bagi bangsa djoega hoendjoek berbagi-bagi perbeda'an. Bangsa Mongool beroemah selaloe dideket soengei dan lapangan jang toemboe roempoet; marika toentoet penghidoepan mengoembara, dan dari itoe matjem kabiasa'an pinda-pinda tempat jang djadi sanget oemoem telah terlahir satoe bangsa, jang djadi pokonja dari itoe kakwasa'an Mongool jang moentjoel dengen sekoenjoeng-koenjoeng. Dalem marika poenja djeman-djeman jang makmoer, balatentara Goan Tiauw (bangsa Mongool) telah taloekken Asia Tenga, Arabia, disebla barat satoe bagian dari Europa dan di sebla timoer, dan ampir taloekken Japan. Bandingkenlah marika dengen laen-laen bangsa seperti bangsa Tionghoa didjeman Han dan Tang, jang maski itoe waktoe sedeng djajanja tapi tapel wates sebla barat dari itoe karadja'an tjoema sampe di Laoetan Caspian; atawa bangsa Romein tjoema bisa loeasken marika poenja tapel wates disebla timoer tida lebih djaoe dari Laoetan Hitem marika poenja pengaroe militair itoe djeman ada dirasaken betoel-betoel. Belon perna ada satoe bangsa jang bisa pentang kakinja di Europa dan Asia, selaennja bangsa Mongool jalah Goan Tiauw. Resia dari itoe tenaga jang loear biasa jalah kernaitoe bangsa ada bangsa jang tida takoet djalan millioenan pal djaoenja lantaran marika soedah djadi biasa dalem marika poenja penghidoepan hari-hari.