Moekadamat.
Apa jang disadjiken dalem ini boekoe ada overdruk dari serie artikel jang soedah dimoeat dalem maandblad Moestika Dharma dari Maart 1936 sampe November 1939, totaal 45 nomor.
Boekan sadja dimoeatnja berängsoeran pada satiap boelan, tapi dikerdjakennja poen begitoe djoega ― tida lantes disalin dan dibitjaraken sampe beres dalem sedikit tempo, hanja ditoelis satiap boelan menoeroet kaperloeannja, dan fatsal pengabisan baroe selese pada 8 Juli 1939.
Ini katerangan ada perloe seepaja pembatja dapet mengarti apa sebabnja pada banjak fatsal ada diberi katerangan atawa pametjahan jang bersama'an atawa mirip satoe dengen laen - pengoelangan dari apa jang soedah diroendingin atawa diseboet doeloean jang brangkalih orang anggep ada kalebihan. Ini kagandjilan ada dari lantaran dalem itoe tempo jang berdjalan ampir ampat taon lamanja kita tida bisa inget lagi apa jang saedah ditoelis doeloean dan tida ada kasempetan boeat batja lagi satoe per satoe, hanja perhatiken sadja apa jang sedeng dihadepken, boeat beri katerangan satimpal dan dirasa memoeasken pada itoe fatsal-fatsal jang baroe disalin.
Tapi ini tjara poen ada djoega kabaekannja. Itoe persama'an dan pengoelangan tjoemah bisa dikenalin kapan orang membatja antero isinja teroes-meneroes, hal mana sabenernja ada sedikit berat, kerna tebelnja ini boekoe membikin orang moesti ambil tempo dari anem sampe toeȧjoeh djam kapan membatja dengen tjepet boeat saliwatan zonder dipikir, ditimbang dan disaring lagi maksoednja satoe per satqe. Inf tjara membatja dengen tjepet ampir tida ada faedahnja, sebab boekan sadja orang tida gampang mengarti dan tangkep maksoednja, hanja tida bisa merasain aloes, indah dan agoengnja Tagore poenja oedjar-
