I.
Di Kanglam ada tinggal satoe hartawan besar jang bernama Thio Siong Leng, siapa mempoenjai satoe anak lelaki bernama Thio Ho alias Hong Ang. Oleh kerna koelawarga Thio ada sangat hartawan, Thio Ho jang sadari ketjil memang tabeatnja soeka sama ilmoe silat, salaennja beladjar ilmoe sastra, selamanja mejakinken ilmoe poekoelan dengen tangan kosong atawa poen dengen sendjata, asal sadja ia bisa mendapat tempo. Sedang Thio Siong Leng ada sangat sajang pada anaknja itoe jang tjoema satoe-satoenja, hingga segala kainginannja jang pantas selaloe ditoeroet. Meliat poetranja soeka sekali mejakinken ilmoe poekoelan, dengen sengadja ia oendangin bebrapa goeroe silat jang pande boewat mengadjar pada poetranja itoe.
Pada soeatoe hari djoestrue Thio Ho lagi berdiri di depan pintoe roemahnja mendadak ia liat di sabelah depan ada mendatengin satoe hweeshio jang berkawan sama doewa saykong, tatkala iaorang meliwat di depan roemahnja koelawarga Thio, itoe hweeshio mengawasin dengen terliti pada Thio Ho sampe bebrapa sa’at lamanja.
„Boe Liang Hoet, siantjay, siantjay,” kata itoe hweeshio, „ini anak ada berdjodo sama akoe boewa mendjadi goeroe dan moerid, biarlah sekarang akoe samperin padanja boewat berkenalan.”
