86
TJERITA ROMAN
hormat jang haroes ditoeloeng dari itoe djoerang jang kotor.
Dengen pesat ia kandarken autonja menoedjoe ka kantoor politie.
Roepanja politie di Batavia soedah lama tjioem baoe tentang adanja itoe kaoem Macao-po dan soedah lama intjerken matanja pada itoe tengkoelak-tengkoelak manoesia jang di waktoe blakangan ini banjak sekali dibitjaraken, tapi sebegitoe djaoeh marika tida bisa dapetken boekti-boekti jang terang boeat lakoeken penggropiokan. Tapi maskipoen begitoe politie di Batavia selaloe masih pasang koepingnja boeat denger-dengerken tentang adanja itoe perdagangan prempoean-prempoean moeda jang dilakoeken di ini negri.
Begitoelah itoe hari, waktoe dapetken itoe ketrangan dari King-san dengen itoe boekti-boekti dan pengoendjoekan di mana adanja itoe kaoem Macao-po di semboeniken, politie laloe siapken bebrapa rombongan politie dengen perkandaraan motorfiets aken lakoeken itoe penggropiokan pada gedongnja Kuang-hong jang terletak sedikit di loear kota Batavia dan djoega di Sindanglaja di itoe ,,Villa Seneng”.
King-san sesoedahnja kasihken itoe semoea ketrangan pada politie dengen perasa’an legah ia laloe poelang kombali aken beritaoeken itoe pada sang ajah, kerna ia ingin sekali boektiken pada papanja, jang di itoe maleman ia boekannja beroeroesan dengen prempoean jang sembarangan, tapi dengen satoe gadis jang terhormat, jang soeda masoek dalem djebakannja itoe kawanan Tengkoelak manoesia.
