'MACAO-PO'
79
moesti djaga kaoe poenja nama, djangan sampe kaoe nanti dipandeng sebagi satoe pemoeda jang tida terdidik, hingga berdeketan dengen segala prempoean rendah,” berkata itoe Ntjik Lotia dengen melolotken matanja.
„Akoe nanti pergi sendiri dengen orang-orang politie boeat menjataken betoel tidanja apa jang papa ada bilang.” King-san ambil itoe poetoesan kerna ia masih tida pertjaja jang itoe prempoean moeda jang semalem ada bitjara dan minta ia poenja pertoeloengan ada satoe prempoean jang rendah moraalnja.
„King-san . . . . . . . . .” berseroeh itoe ajah. „Akoe larang kaoe pergi ka itoe roemah, kerna akoe koeatirken, kaoe nanti bikin tjemar akoe poenja nama baek. Inget, kaloe kaoe tida toeroet akoe poenja prentah . . . . . . . . .”
King-san pandeng dengen perasa'an heran dan penasaran pada sang ajah. Ia ingin langgar prentahnja sang ajah, tapi toch ia merasa koeatir djoega apa jang di tjeritaken oleh sang ajah tadi ada betoel, jang A-moay ada satoe prempoean rendah, jang tjoema ingin gaet sadja pada kantongnja pemoeda hartawan.
Ia laloe masoek ka dalem kamarnja dengen pikiran masih berklai keras. Di dalem soenjinja ia seperti denger soeara keloehannja itoe gadis jang tjantik jang soedah dapet tjoeri hatinja. Itoe paras moeka jang tjantik, itoe mata jang tjeli, itoe moeloet jang moengil, dan itoe toeboeh jang molek dari A-moay selaloe berbajang di depannja. „Ach, apakah bisa djadi ia ada satoe pendjoesta, satoe penipoe?” ia berkata dengen plahan. „Tida . . . . . . . . .
