King-san menoeroet dan sesampenja di dalem satoe kamar, itoe orang gemoek boeka pintoenja dan djorokin padanja masoek dan. . . . . . . . . . . . ia dapetken A-moay dalem itoe keada'an sebagimana soedah diloekisken di bagian atas.
Njatalah itoe pesta taoenan soedah dibikin di satoe roemah berdeelnja Kuang-hong, itoe manoesia kedjem.
Dengen tindakan jang tjepet King-san tinggalken kamarnja A-moay dan laloe menoedjoe ka roeangan di mana tadinja ada dilakoeken itoe pesta taoenan, tapi keada'an soedah soenji sekali. Tida satoe manoesia poen ada terdapet di sitoe. Ia berdjalan teroes menoedjoe ka pintoe depan dan di sitoe ia dapetken itoe boedjang prempoean doedoek di satoe korsih dengen matanja kliatan ngantoek sekali.
„Boeka ini pintoe dan kasih akoe berlalue dari sini,” membentak King-san dengan sedikit keras.
Itoe prempoean tida berkata apa-apa dan laloe lakoeken apa jang diprentah.
Dari itoe roemah ia kepaksa berdjalan kaki poelang, kerna di waktoean begitoe tentoe sadja ia tida bisa dapetken sado atawa laen-laen kendara'an. Iapoenja pikiran teroes bekerdja dengan keras sekali boeat tjari satoe djalan aken bisa lolosken itoe gadis dari tjangkremannja itoe kawanan srigala.
„Satoe-satoenja djalan, adalah bertaoeken itoe semoea pada politie.” Berpikir King-san. Dan itoe sa'at djoega ia ingin bisa koendjoengin kantoor politie, tapi ia oeroengken itoe niatan, kerna ia pikir ada lebih baek bertaoeken ini hal lebih doeloe pada iapoenja ajah sendiri, jang ada mendjadi Lotia dan
