'MACAO-PO'
71
Ntjik dan Ntjim So Kiang-seng, jang selaennja mendjadi Wijkmeester, poen Ntjik Kiang-seng ada satoe orang jang terkemoeka dalem pergaoelannja dan bekerdja banjak sekali dalem kalangan Sia.
Poen dalem kalangan pemerentah ia ada di kenal sebagi sala seorang ambtenaar jang djoedjoer dan lakoeken pekerdja'an dengen baek dan setia sekali.
Maskipoen ia sekarang ada teritoeng satoe hartawan besar, toch ia tida maoe lepasken itoe djabatan sebagi Wijk meester atawa Lotia.
Ia telah dikoerniain doea anak, satoe lelaki dan satoe prempoean. Jang laki jaitoe King-san, jang sekarang baroe menandjak ka oesia doea poeloeh tiga taoen, sedeng jang prempoean, So Tien-nio, baroe sadja beroesia anem belas taoen dan masih doedoek dalem bangkoe sekolah.
King-san ada sanget ditjinta oleh iboe-bapanja, kerna ia memang ada satoe anak jang berbakti, jang belon pernah bikin menjesel pada kedoea orang toeanja. Iapoenja pergaoelan pada sobat-sobatnja ada baek sedeng dalem sekolahannja ia ada teritoeng satoe moerid jang radjin.
Maskipoen iapoenja oesia soedah dewasa, tapi King-san belon pernah kloejoeran malem sebagimana laen-laennja pemoeda jang sepantaran dengen ianja.
Begitoelah itoe sore ,atas perminta'annja iapoenja sala-satoe sobat, ia ada diminta boeat dateng koendjoengin satoe pesta taoen dari Hoo-liang di roemahnja. Tapi sesampenja di roemahnja itoe temen, ia di kasih taoe jang itoe persta tida bisa dibikin di itoe roemah berhoeboeng dengan adanja sala satoe familie jang sakit di itoe roemah. Dan begitoelah ia serta banjak kawan-kawannja soedah di
