'MACAO-PO'
65
dateng aken permaenken padanja, tapi dengen sanget goegoep itoe anak moeda berkata poela: „Lagi sekali ma'afken padakoe nona, akoe semoestinja tida masoek dalem ini kamar.” Badannja itoe pemoeda kliatan sedikit goemeteran. „Akoe sebetoelnja ingin boeat bisa kloear dari ini roemah, tapi.... tapi orang soedah paksa masoekken padakoe dalem ini kamar, jang ternjata.............” Ia tida teroesken itoe perkata'an dan laloe maoe berdjalan kloear lagi.
„Toenggoe.................. kedengeran A-moay berkata.” „Djangan kaoe kloear doeloe. Djangan kaoe pergi. Kaoe roepanja ada satoe orang jang djoedjoer. Toeloenglah pada akoe poenja diri kaloe kaoe ada soeka.”
Denger itoe oetjapan, itoe pemoeda djadi sedikit heran, ia tida mengerti apa jang dimaoeken oleh itoe orang prempoean moeda. Ia laloe pandeng pada itoe prempoean dan dapetken di moekanja itoe gadis ada tanda-tanda beret bekas poekoelan atawa aniaja'an, maka ia tida ada itoe ketegahan hati boeat tinggalken itoe prempoean jang soedah minta iapoenja pertoeloengan.
„Apakah bisa djadi, jang ini anak gadis berada di dalem ketjilaka'an?” berpikir itoe anak moeda.
„Toeloenglah padakoe........?” meminta A-moay poela, waktoe meliat pada itoe pemoeda jang masih bersangsi-sangsi.
„Toeloengin padamoe?” menanja itoe pemoeda. „Apakah jang soedah terdjadi atas kaoe poenja diri? Apakah kaoe dalem sengsara?”
„O, lebih dari itoe........ Orang soedah tipo.......... Orang soedah aniaja akoe poenja diri.” berkata A moay dengen soearanja jang memiloeken hati.
,,Akoe soedah dimasoeken dalem ini kandang jang
