’MACAO-PO’
63
bacil-bacil penjakit jang paling djahat bagi kita poenja masjarakat, boeat meloeasken peroesahannja aken kemoedian bisa kasihken kesenengan jang tida terbates pada itoe kebanjakan kaoem hartawan dan kaoem ternama.
Bagimanakah perasa'annja itoe kebanjakan kaoem hartawan jang ternama, kaloe seande marika poenja poetri atawa soedara prempoean sendiri aken diperlakoeken dan diperkosa dengen itoe matjem perboeatan oleh segala manoesia bedoboran? Biarlah ini nanti aken didjawab oleh marika, jang membrasahi dirinja ada itoe orang jang berhak boeat kasihken itoe djawaban.
Boeat tida membikin lekas antjoernja kita poenja maatschappij di ini negri, biarlah kita poenja kaoem intellectueelen nanti berdaja boeat adaken pembantrasan dengen adanja itoe sekalian tengkoelak-tengkoelak manoesia jang dilakoeken di ini djaman jang sopan, jang doenia soedah lama sekali meninggalkennja itoe matjem perdagangan.
