'MACAO-PO'
55
jang sama sekali tida bisa berdaja apa-apa.
Seperti djoega pada hari kemaren, begitoelah keada'an itoe waktoe ada sanget soenji sekali.
Sebentar lagi ia denger ada tindakannja orang mendatengin dan kemoedian ia denger soearanja koentji terpoeter.
„Saja harep itoe boeroeng dara tida lagi boeas seperti pada hari kemaren,” Kedengeran satoe soeara orang laki.
„Ja, kaoe boleh pertjaja padakoe jang ia tida aken bikin perlawanan apa-apa, kerna ia soedah tida berdaja.” A-moay kenalin itoelah ada soearanja itoe orang jang soedah poekoelin iapoenja badan sampe setengah mateng.
Denger itoe semoea A-moay poenja badan djadi sanget bergoemeteran.
„Masoeklah, toean,” kedengeran Kuang-hong silahken pada itoe orang.
Begitoelah itoe bah-tao laloe boeka itoe kamar dan silahken itoe Andjing Adjak, jang meroepaken sebagi Manoesia Setan, masoek di dalem kamarnja itoe Anak Domba, jang tida berdosa soeatoe apa.
A-moay dalem iapoenja keada'an jang begitoe roepa, tida bisa berboeat apa-apa boeat bisa belahken iapoenja diri dari itoe bahaja, achirnja moesti menjerah kalah.
Och, manoesia, kaoe dilahirken tjoema boeat saingin keboeasa'annja itoe binatang-binatang jang paling boeas. Njatalah kaoe ada manoesia, machloek Gila.
