52
TJERITA ROMAN
tidoernja boeat bisa digoenaken aken djiret lehernja sendiri, iapoenja mata kebentrok dengen itoe tjintjin jang berada di tangannja, dan itoe waktoe ia teringet kombali pada sang iboe jang ia sanget tjintaken dan sang ajah serta soedara-soedaranja jang sedeng menantiken iapoenja kabar............
Meliat itoe, ia djadi oeroengken niatannja boeat djiret dirinjanja, kerna ia masih mempoenjain pengharepan boeat bisa kloear dari itoe roemah.
„O iboe............ iboe............” ia meratap. „Ampoenkenlah padakoe........ iboe.”
Di waktoe ia lagi berada di dalem itoe keada’ an, pintoe kamarnja telah diboeka dan Kuang-hong kliatan berdiri di sitoe sambil........ ketawa.
Waktoe meliat pada itoe orang, A-moay poenja darah laloe menaek dan mendidi. Iapoenja mata telah kloearken sorotan sebagi matjan jang boeas.
„Nona........” moelai berkata Kuang-hong dengen sedikit aloes............ „sebentar malem toean Han Gie-sing, itoe toean jang semalem kaoe soedah tjakarin aken dateng kombali di sini.... dan akoe harep kaoe soeka............”
„Tida............ tida........ akoe tida soedi trima padanja........ akoe nanti berklai lagi boeat oesir padanja dari ini kamar............. goena belahken akoe poenja kehormatan............” A-moay berkata dengen penoeh kemarahan zonder pikir jang itoe ada sanget berbahaja baginja.
Denger itoe semoea perkata’an dari A-moay, Kuang-hong sebaliknja dari marah ia laloe ketawa dan dengen soearanja jang dibikin-bikin ia laloe perkata poela: „Besok kaoe bakal dapetken makahan dan segala apa dengen serba bagoes, kaloe ini malem kaoe soeka trima padanja.”
