'MACAO-PO'
47
atas dirikoe . . . . . . . . .?” berkata A-moay dengen soeara terpoetoes-poetoes.
„Kaoe sanget koerang adjar sekali, binatang!!!” berkata lagi ia dengen soearanja jang sanget menakoetken. „Kaoe soedah perlakoeken kita poenja tetamoe dengen itoe tjara jang sanget meroegiken pada akoe poenja peroesahan . . . . . . . . .”
„O toean . . . . . . . . . Ia maoe mengganggoe padakoe A-moay laloe menangis dengen keras sekali kerna ia merasa sanget djengkel.
Satoe tamperan jang keras dari satoe tangan jang kasar telah dikirim ka moekanja A-moay, hingga bikin itoe gadis djadi . . . . . . . . .sempojangan.
„Och . . . . . . . . . ampoenken . . . . . . . . . akoe toean . . . . . . . . .” mengeloeh A-moay. „Brikenlah kemerdika'an padakoe . . . . . . . . . akoe ingin kloear dari ini roemah . . . . . . . . .”
„Tja . . . . . . . . . briken ampoen padamoe . . . . kaoe . . . . . . . . . kaoe . . . . . . . . . tida lebih dari satoe Macao-po . . . .” berkata itoe bah-tao.
A-moay jang keada'annja boleh dibilang soedah pajah dengen itoe tamperan jang barangkali ada boeat pertama kalinja ia trima sadjek ia hidoep, djadi merasa kaget dengen itoe perkata'an 'Macao-po'. Ia koeatken dirinja boeat briken pembela'an dan berkata:
„O, kaoe salah toean . . . . . . . . . akoe boekan satoe prempoean dari Macao . . . . . . . . . tapi akoe dateng di sini boeat tjakep satoe pekerdja'an di sala satoe familie jang baek-baekan. Akoe ada seorang dari Hongkong . . . . . . . . .”
Dengen tida perdoeliken orang poenja omongan, itoe bah-tao jang ada seorang kedjem, laloe dorong pada A-moay sekeras-kerasnja, sehingga ia poenja kepala membentoer pada itoe tembok marmer . . . . . . . . .
