Baroe sadja A-moay boeka itoe kamar mandi, ia djadi merasa kagoem djoega, kerna selaennja itoe kamar mandi ada sanget bagoes, poen ada mengloearken bebaoehan jang sanget haroem sekali.
Waktoe A-moay sesoedahnja klaar bolehnja bersihken badannja dan kloear dari itoe kamar mandi, ia dapetken kenjata'an jang itoe boedjang soedah tinggalken kamarnja dengen bawa sekalian iapoenja pakean loear, hingga itoe waktoe ia tida laen tjoema berpakean dalem sadja.
Lama sekali ia menantiken datengnja itoe boedjang, tapi ternjata itoe boedjang tida kasih oendjoek mata idoengnja lagi.
A-moay ingin sekali kloear boeat tjari pada itoe boedjang, tapi dengen itoe pakean ia tida bisa tinggalken kamarnja, teroetama kaloe ia inget, jang ia ada tinggal di roemahnja satoe familie baek-baek dan terhormat.
Berdjam-djam telah liwat. Itoe boedjang masih djoega tida dateng boeat bawaken iapoenja pakean serta iapoenja makanan. Sang pagi telah terganti dengen siang dan sang siang mendjadi sore.
Ia moelai koeatir dan merasa heran dengen itoe semoea. Achirnja ia braniken dirinja boeat toch kloear sadja dengen itoe pakean, kerna ia poenja peroet ada sanget lapar, tapi iapoenja terprandjat boekan maen waktoe dapetken itoe pintoe kamar ada terkoentji dari bagian loear, dan sesoedahnja memandeng di sekiternja itoe kamar, ia baroe dapet taoe jang di itoe kamar tida ada djendelanja.
A-moay mendjadi sedikit bingoeng dan tida taoe apa jang ia moesti berboeat, sedeng keada'an itoe waktoe ada sanget soenji sekali. Dan tida lama kemoedian keada'an di itoe kamar ada sanget gelap,
