Hao-cheng laloe perkenalken A-moay pada Kuang-hong, begitoe namanja itoe orang pendek, siapa laloe silahken A-moay masoek.
Kombali di sini A-moay denger Hao-cheng bitjara pada itoe toean roemah dalem bahasa asing, seroepa djoega dengen apa jang Hao-cheng lakoeken dengen Njonja Wong-fat.
„Satoe bidadari jang sanget tjantik sekali,” berkata Kuang-hong dengen mesem. Satoe meseman jang tida bedah sebagi mesemannja satoe hantoe jang djahat.
Hao-cheng manggoetken kepalanja sambil berkata dalem bahasa Inggris soepaja A-moay djoega bisa dengerken: „Njonja Wong ada minta akoe poenja bantoean boeat anterin ini nona pada Njonja besar di sini, kerna satoe oeroesan jang penting telah menghalangin boeat Njonja Wong anter sendiri pada ini nona. Ia bisa bahasa Inggris.”
„Nona . . . . . . . . . . . .” berkata itoe toean roemah dengen kasar. „Apakah kaoe taoe pekerdja'an apa jang kaoe aken lakoeken di sini?”
„Ja, toean . . . . . . . . boeat melajanin pada toean poenja poetri, kaloe saja tida sala . . . . . . . . . . . .” menjaoet A-moay dengen plahan.
„Hm . . . . . . . . . . . . . . . .”
Hao-cheng, sesoedahnja serahken itoe boeroeng dara pada Kuang-hong laloe berpamitan sambil berkata pada itoe nona:
„Akoe harep kaoe banjak seneng di ini roemah.”
„O, trima kasih . . . . . . . . . . . .”
„Toeroet padakoe, nona,” meminta Kuang-hong pada itoe nona.
A-moay sanget kagoemken tentang keada'annja itoe gedong jang begitoe indah dengen perabotan-
