'MACAO-PO'
37
III.
HARI Djoemahat sore, kapal „St. Adelgonde” telah lepasken djangkarnja di pelaboean Tandjong Priok, plaboean jang terbesar boeat di seloeroeh Indonesia.
Dengen bantoeannja sala satoe ambtenaar immigratie, jang ternjata djoega ada mendjadi komplotannja itoe sekalian tengkoelak manoesia, A-moay serta Hao-cheng telah bisa masoek di tanah Indonesia dengen begitoe gampang sekali.
Chauffeur dari itoe taxi jang marika toenggangin roepanja djoega soedah taoe ia moesti anterken penoempangnja ka mana, kerna zonder di kasih taoe apa-apa itoe chauffeur soedah bawa pada marika di mana satoe gedong jang besar dan angker, jang letaknja sedikit di loear kota Batavia.
„Gedong jang begini besar dan mentereng, tida laen tjoema bisa di poenjain oleh orang-orang hartawan besar,” pikir A-moay waktoe itoe auto soedah dibrentiken di depannja satoe gedong jang sanget besar dan indah.
Seorang jang berpengawakan gemoek pendek kliatan kloear dari itoe gedong. Satoe meseman simpoel laloe terliat di tampang moekanja, waktoe ia mengetahoei jang dateng ada Hao-cheng dengen satoe nona jang begitoe tjantik.
Waktoe boeat pertama kali A-moay menampak itoe paras moeka, dari itoe orang, ia soedah mempoenjai perasa'an bentji dan tida soeka.
Ia merasa takoet meliat itoe aer moeka jang begitoe bengis, kedjem ditambah dengen iapoenja koemis jang pandjang, seolah-olah koemis dari Von Hindenburg.
