’MACAO-PO’
25
II.
HARIAN A-moay moesti tinggalken iapoenja roemah, telah sampe.
Iapoenja papa, mama serta doea soedaranja ada anterken ia ka plaboean di Hongkong, di mana Njonja Wong-fat soedah berada di sitoe.
Waktoe njonja Kong-chang boeat pertama kali menampak pada moekanja itoe njonja bangsawan, ia djadi sedikit terkedjoet dan merasa tida begitoe soeka pada itoe njonja. Iapoenja mata jang awas, seperti mengasih taoe jang ia sekarang berhadepan boekan dengen orang jang baek-baek, maskipoen itoe njonja ada berlakoe begitoe baek terhadep padanja.
Tapi itoe iboe tida bisa berboeat laen dari pada mengelah napasnja sadja dan saben-saben mengeloeh pada dirinja sendiri: „O, Allah, lindoenginlah pada anakkoe ini.”
Berpisahan antara iboe dan anak ada sanget mengharoeken sekali, dan waktoe A-moay mendeketin pada sang iboe boeat ambil slamet berpisah, itoe iboe laloe toendoeken kepalanja dan dapet pandeng pada itoe tjintjin jang berada di djari tangannja. Itoe ada satoe tjintjin mas jang ada oekiranaja dengen hoeroef 貞 潔 (Tjeng-tjiat kesoetjian). Ia laloe tjopot itoe tjintjin dari djari tangannja dan laloe beriken itoe pada sang anak seraja berkata: „A-moay, pakelah ini tjintjin sebagi peringetan dari kaoe poenja iboe. Dan apabila kaoe soedah berada di tempat jang djaoeh sekali, soekalah kaoe saben-saben pandeng pada ini tjintjin dengen itoe oekiran hoeroef kesoetjian. Inget selaloe,
