„Ja, A-moay,” ia berkata sambil aer matanja teroes kloear dengen tida kena ditjegah. „Akoe djoega toeroet girang. Biarlah Allah jang Maha Besar nanti berkahi dan lindoengin pada kaoe poenja perdjalanan dan di mana sadja kaoe ada dateng.”
„Tapi, mama. . . . . . . . . . . . kenapa kaoe menangis?”
„Och, dari lantaran girang, anakkoe?”
Ia tida brani oetaraken iapoenja perasa'an koeatir di hadepannja sang anak lagi, kerna koeatirken nanti bikin itoe anak jang soedah mempoenjain niatan jang pasti, aken djadi menjesel.
„Akoe saben-saben nanti toelis padamoe iboe, apabila akoe soedah sampe di Batavia. . . . . . . .”
Sang iboe mesem, maskipoen dalem hatinja merasa antjoer sekali,
Begitoelah dalem doea hari blakangan A-moay kliatan begitoe repot, boeat atoer ini itoe dan ambil slamet berpisah pada semoea sobat-sobat di itoe tempat, jang semoeanja mengasih slamet atas A-moay poenja kebroentoengan.
Iapoenja iboe dengen hatinja jang sanget antjoer djoega ada bantoe pada sang poetri jang ia sanget tjintaken dan jang tida lama poela aken tinggalken padanja boeat satoe waktoe jang. . . . . . . . . . . . tida dapet di tentoeken. „A-moay,” berkata itoe iboe. „Di laen orang poenja negri, akoe harep kaoe soeka berlakoe hati-hati sekali, anakkoe.”
„Pesenanmoe senantiasa teroekir di dalem hatikoe, iboe.” menjaoet A-moay.
A-moay tida loepaken djoega boeat tinggalken pesenan pada sang ade, A-lien dan saben-saben tjioemin itoe soedara dengen bernapsoe, sedeng aer matanja saben-saben membasahi pipinja.
