„Pekerdja'an jang aken dilakoeken itoe tida laen dari pada melajanin seorang gadis jang ingin dapetken temen boeat bitjara, jang soedah faham dalem itoe bahasa.”
„Njonja, apakah akoe boleh tanja; akoe moesti sedia apa goena keperloean itoe perdjalanan ka Batavia?” menanja A-moay, kerna ia taoe jang apabila ia moesti sedia pakean-pakean dan laen-laennja, itoe tentoe tida bisa, kerna oewang boeat itoe, ini waktoe ia tida poenja sama sekali, begitoepoen iapoenja ajah.
„Itoe tida perloe,” berkata itoe njonja. „Kaoe bisa pergi dengen ini pakean jang sekarang kaoe ada pake. Akoe poenja keponakan jang bakal mendjadi kaoe poenja temen boeat diadjak bitjara, aken kasihken kaoe pakean jang setjoekoepnja, kapan kaoe soedah berada di Batavia. Kaoe tida perloe bikin persedia'an apa-apa, baek pakean, maoepoen apa sadja. Tjoema kaloe bisa akoe aken brangkat pada tiga hari lagi ka Batavia, apakah kaoe bisa moefakat?”
„Apa perloe begitoe lekas?” menanja ajahnja A-moay.
„Ja, kerna akoe masih ada satoe oeroesan lagi di Singapore, dimana kita aken singa dalem kita poenja perdjalanan ka Batavia.”
Denger itoe perkata'an 'Singapore' A-moay djadi sanget girang sekali, kerna dengen begitoe ia bisa liat keada'an kota Singapore sekalian.
„Di Singapore kita aken tinggal boeat kira-kira tiga hari, aken kemoedian teroesken kita poenja perdjalanan ka Java dengen sala satoe kapal dari kongsi Blanda.”
Sesoedah dapet taoe itoe semoea A-moay djadi
