„Apakah akoe bisa taoe nona sekarang beroesia brapa dan sekalian nona poenja nama?”
„Akoe baroe sadja menandjak ka oesia 18 taoen dan akoe poenja nama ada Kong- A-moay.”
„Dan apa nona poenja orang toea masih ada?”
„Ja, ini ada akoe poenja papa, sedeng akoe poenja mama poen masih hidoep.”
„O, dengen begitoe djadi nona poenja papa tida merasa kebratan boeat nona bekerdja di loear negri?”
„Tentoe sadja tida, njonja,” menjaoet Kong-chang. „Kerna kita sekarang ada mempoenjai tiga anak, sedeng akoe poenja penghasilan dari oewang pensioenan ada terlaloe sedikit boeat bisa ongkosin pada marika semoeanja. Akoe poenja poetri jang paling toea ini selaloe ada mempoenjai keinginan boeat bisa bikin perdjalanan keloear negeri dan ini ada satoe koetika jang baek sekali bagi ianja boeat tawarken iapoenja diri aken lamar itoe pekerdja'an jang njonja ada minta. Biarlah akoe banjak harep soepaja iapoenja keinginan itoe bisa kesampean dengen njonja soeka trimaken padanja itoe pekerdja'an. Ia ada satoe gadis jang sanget radjin dan soeka bekerdja. Njonja boleh pertjaja pada akoe, boekannja lantaran ia ada akoe poenja anak sendiri, tapi akỏe bitjara ini dengen sebenernja sadja.”
„O, boeat itoe akoe poen sampe pertjaja, toean,” berkata itoe njonja, jang ternjata ada berlakoe baek sekali terhadep pada itoe orang toea teroetama pada itoe nona.
Maskipoen ia kliatannja ada seperti satoe njonja hartawan besar, tapi toch ia tida kasih oendjoek itoe keagoengan.
