“Ramo-ramo sikumbang Janti.
Katik Endah pulang bakudo.
Patah tumbuah hilang baganti,
Adat - Pusako baitu juo”.
Siriah naiak junjungan naiak — sadanglah LKAAM Sumatera Barat — jo Bundo Kanduang Minangkabau — dapeklah rundingan nan saukua — sarato kato nan saiyo — bungka diganggam Niniak Mamak — taraju arek diganggam Bundo Kanduang.
Dek bulek lah buliah digolongkan — picak lah buliah dilayangkan — lorong di pihak bapak Gubernur — Pusek Jalo Pumpunan Ikan — dipacik arek diganggam taguah.
Ulak-ulainyo kato hantun — adok kami nan manyusun — nan bak tali sapilin tigo — dijapuik Adat dari rumpunnyo — disusun tangkai ciek-ciek — dibuhua dikabek arek — dibukukan ka buku kaciak nangko — disambahkan kapado pandidikan — pandidik anak kamanakan — angkatan mudo Minangkabau — nak tahu dikilek dangan bayang — tahu dibaso dangan basi —- tahu dihereang dangan gendeang — nak tahu diangin nan basiru — Iyo diombak nan badabua — sarato dikarang nan balungguak.
Salaruik salamo nangko — Adat disangkuikkan di Tiang Panjang — indak tajambo di nan mudo. Nan sahinggo iko ka ateh -- hutang dek guru manurunkannyo — nan samo-samo najak dangan asok — nan samo-samo turun dangan ambun —- kapado anak murik di Minang ko — supayo bungo nak nyo kambang — supayo putiak nak jadi buah
Kahadapan bapak Kapalo Dinas — kami muhun tarimo ka- sih — ateh pitunjuak baliau barikan — sasuai jo paraturan nan balaku —- manuruik barih jo batabeh.
Kahadapan bapak Kakanwil — Departemen P dan K Sumatera Barat — kamipun muhun tarimo kasih — ateh pitua baliau turunkan — manuruik seni dan budaya — sasuai ukua dangan jangko.
ii
