Halaman ini telah diuji baca
poenja sobat Perkins jang ada disitoe. Perkins kasi tangan padanja sambil berkata:
—— Angkaoe soeda berboeat barang jang baik. Ming, betoel angkaoe ada satoe orang baik.
—— Apa saija nanti bilang kapadamoe, toean kaptein, ——menjaoet itoe president,—— saija bikin sabole-bole sopaija djadi sama seperti angkaoe dan toean Arthur. Tetapi marilab kita poelang, samoea itoe terkedjoetan bikin saija sakit. Baiknja saija soeda sadia-sadia lebi doeloe. Saija poenja kokki soeda masak makanan jang enak-enak akan bikin baik kombali pada saija, dan saija minta angkaoe nanti toeroet makan. Saija harep djoega jang angkaoe poenja sobat nanti bri itoe kahormatan pada saija akan trima saija poenja permintaän.
Toean Arthur toendoek dengan mesam. Ming kasi masoek tangannja di bawa itoe toekang madat glap poenja tangan dan itoe praoe dari itoe president lantas ladjoe ka poeloe Honan oleh pengajoenja sapoeloe toekang dajoeng.
Satoe djam di blakang, koetika itoe algodjo lagi kasi laloe itoe bangké jang tertjintjang dari itoe pangoeng, Liou Siou dan Ité bersama-sama njonja Liou ada toetoep itoe perdjandjian kawin, (liat gambar) kendatinja oendang-oendang larang dia-orang tiada bole kawin, djikaloe belon liwat tiga boelan.
Pada itoe djam djoega itoe president dari pengadilan di Canton jang terhormat, ambtenaar klas tiga Ming Lou-ti, pergi doedoek di medja bersama-sama itoe doea orang Inggris jang di adjak olehnja makan dan bilang dengan soeara pelahan, sahinga njata jang dia soeda dapat bebaoe dari itoe makanan jang enak.
—— Begimana djoega sobat-sobatkoe, heiran sakali jang saija soeda terlepas dari itoe djirattan. Djikaloe tiada ada angkaoe barangkali sekarang ini saija soeda trima saratoes poekoelan rottan dan tiada bisa bikin soeka-soeka ati dengan pantes dari itoe kabaikan antara negri Tjina dan lnggris.
Tamat
