NAMANJA
LAWAH-LAWAH MERAH,
IJA ITOE:
SATOE TJARITA DARI NEGRI TJINA.
Fatsal Ka I.
---
AKAN HAL KAWINNJA SA-ORANG TJINA JANG TAPELADJAR BERNAMA LIN.Maka hari soedahlah mendjadi malam, kapal-kapal dari mana-mana negri jang berlajar didalam kali Moetiara, itoe sadja jang kaliatan seperti satoe bajang-bajang didalam oewap omboen jang terbit dari dalam aër sasoedanja matahari masok; segala boeroeng-boeroeng kasi dengar sawarannja jang pengabisan jang mana kadengaran ilang-ilang deri djaoe, segala kembang-kembang soeda djadi koentjoep, bagitoelah ada satoe tanda jang segala sa-sawatoe soeda mentjari kasenangannja pada tampat jang sepi didalam negri.
Pada sabrang kanan dari itoe kali besar, jang mana ada satoe djalanan sendiri sadja di antara Makao dan Kanton, misi ada rame-rame didalam sa-watoe roema gedong, lampoe-lampoenja samoea misi trang ija itoe satoe kabedaän dari pada kasepian jang ada di koelilingnja itoe.
Disitoepoen ada satoe koempoelan toekang moesik jang banjaknja ada 100 orang lagi bermain lagoenja jang indah-indah dan di samboet oleh angin; goenoeng-goenoengan deri api bertjahja trang sapoeter itoe gedong dan sabantar-bantar berboeni sawara patasan jang apinja naik ka awan-awan dan komediannja djato di sawa serta mengoesir bariboe-riboe boeroeng-boeroeng besar jang biroe roepanja dan pergi terbang dengan sakoeat-koeatnja.
Maka di itoe gedong ada tampat tinggalnja itoe Lin jang mana ija soeda kawin pada waktoe pagi dan itoe pesta jang di bri pada sobat-sobatnja di itoe koetika adalah kaliatan seperti tiada ada kasoedahannja.
Sa-orang poen tiada jang ingat akan berdjalan poelang. Kapal-kapal samoea jang riassannja bagoes dengan bandera roepa-roepa dan itoe gotong-gotongan jang mana misti bawa poelang tetamoe, misti djoega akan toenggoe lagi lama-lama pada dia-orang, tetapi itoe Lin pada satoe-satoe kali oendjoek dia poenja koerang sabar, karna dia kapengin beladjar kanal kapada dia poenja penganten prampoean jang mana dia-orang doea blon taoe meliat satoe sama lain. ltoelah ada satoe hadat di negri Tjina, laki dan bini bertemoe satoe sama lain djikaloe dia-orang soedah terikat berdoea boeat salama-lamanja.
Maka itoe Lin tiada taoe satoe apa-apa, tetapi tjoema dia poenja taoe, jang pengantennja ada nama Liou Siou dan lagi sapatoe prampoean itoe ada dari soetra merah, jang mana sapatoe itoe ada amat ketjil boeat satoe anak jang dari 10 tahon oemoernja.
Adapoen bapa dari itoe Lin, satoe soedagar jang paling kaija dari semoea jang ada di Kotta Kanton, pada satoe hari soeda bitjara sama anaknja laki-laki itoe, katanja jang sekarang soeda sampe tempo boeat
