Halaman:Lamijoe Wakong.pdf/86

Dari Wikisource bahasa Indonesia, perpustakaan bebas
Loncat ke navigasi Loncat ke pencarian
Halaman ini tervalidasi

84

sama goewa, nantie goewa bikin kenaija semoeanja die dalem roema loe, en Oeij Pek Ijanio dengar katanja begitoe, mendjadie takoet, en lantas toeroet kawin itoe malem, en soeda pagie itoe Wakong palsoe pegie, dia kata: nantie saban malem goewa dateng.

Tjarita hwangwe Oeij San Gar, bapanja Oeij Pek Ijanio, tanja sama boedak ketjilnja kata: semalem Siotjia ada mengomong sama siapa? en loe dengar tiada? boedaknja kata: saija djoega maoe tanja sama hwangwe, en bapanja mara lantas soeroe pangil Siotjia, Siotjia lantas kloewar, liat bapanja mara, lantas Siotjia koewie die depan bapanja, bapanja tanja: lagi semalem goewa dengar loe mengomong sama siapa, die kamar? barang kalie loe simpen lelakie, loe kerdja tiada patoet bikin goewa maloe, en loe mistie bilang betoel! Siotjia kata: tiada orang siapa njang saija adjak mengomoeng, saija sendirie tarik napas, bapanja kata: tiada bole djadie loe tarik napas, en goewa soeda dengar ada soewaranja orang lelakie, en kapan loe tiada maoe bilang betoel, goewa nantie poekoel loe sampe matie, loe bikin goewa maloe, Siotjia dengar bapanja maoe poekoel matie dengan begitoe mara, Siotjia lantas bilang kata: boekannja siapa, en Wakong njang toeloengin saija, semalem dia dateng adjak saija kawin, en saija tiada maoe, dia maoe kenaija semoeanja roema bikin matie, djadie saija awa takoet dengan ada dia poenja bae, dari itoe saija toeroet, en bapanja dengar anaknja tjarita begitoe, lantas mara, kata: kaloe begitoe, kotor ingatlannja, en boekannja djadie Toapekong, djadie bikinnin dia Bio pertjoema, lebie bae rombak lagie sadja itoe Bio, anaknja kata: bapa nantie doeloe rombak itoe Bio, barang