83
bikin 1 Bio haroe, bagoes sekalie, dengan bikinin gambarnja, Wakong sama-sama boedaknja Tjan Ligan Soen Hong Njie, ada 5 boelan abis die bikin itoe dengan tjat aer mas, tjarie arie njang bae, en lantas hwangwe adjak sanak soedara semoeanja dateng die Bio sembaijang pangil waijang dengan orang-orang kampoeng semoeanja dateng pasang lilin hio, rame sekalie, 3 hari 3 malem baroe soeda-än.
Tjarita ini Saijkong dia poenja Bio Tjeng Hian Koan soeda Wakong bakar, tiada tempat, atienja sakit sekalie maoe kenaija Wakong tiada perdjalanan njang bole die kenaija, kaloe maoe lawan tiada bole menang sebab Wakong saktie, djadie dia sabarin sadja, dengar kabar hwangwe bapanja dari Oeij Pek Ijanio bikinin Wakong Bio, dia pikir sekarang bole pake akal kita „phie” djadie beroepa Wakong, en lantas dia terbang djalan die awan, sampe die roemanja Oeij Pek Ijanio, dia „phie” beroepa Wakong, malem djem poekoel 2, dia ketok pintoenja, Oeij Pek Ijanio lagie doedoek, dengar orang ketok pintoe, Oeij Pek Ijanio tanja: siapa njang ketok pintoe beginie malem? menjaoet: goewa Wakong! en kapan loe tiada maoe boeka pintoe, goewa nantie bikin loe matie semoeanja njang ada die dalem roema, Oeij Pek Ijanio dengar dia kata Wakong, en lantas dia boeka'in pintoe, liat betoel Wakong, en lantas koewie sembarie bilang kata: banjak trima kasie njang soeda toeloengin saija poenja djiwa, Wakong palsoe kata: itoe 1 arie goewa liat loe begitoe bagoes, mangka sekarang goewa dateng lagie die sini, en goewa maoe kawin sama loe, Oeij Pek Ijanio kata Tian Ong orang die langit sepertie Toapekong, kenapa beginie atoerannja? Wakong palsoe kata: kaloe tiada maoe toeroet
