64
Tian Potek Koan, abis bitjara, en lantas dia berdoewa naek die awan, baroe setengah awan, Koan Im njang palsoe pikir kaloe sampe die pintoe langit, kaget die katja'in kliatan moeka goewa, djadie tiada bae, en lantas njang palsoe larie, Koan Im njang betoel liat día larie, Koan Im toeroen pegie die Tjeng Liangsan, ketemoe Boensoe Pouhian, dia kata: goewa maoe adjak dia pegie die pintoe langit maoe masoekkin dia die bokor mas bawa sama Toehan, en tiada taoe dia takoet en lantas larie, sekareng Tetjoe berdoewa mistie djaga ini tempat djangan sampe dia kena ambil, dia maoe doedoekkin ini tempat djadie tiada bae, abis bitjara Koan Im lantas poelang die Lam Haij Potosan.
Tjarita Wakong soeda larie dateng lagie die Tjeng Liangsan makie-makie sama ini Boensoe Pouhian, dia kata: sekarang loe berdoewa mistie pegie dari ini tempat, en kasie sama goewa tingalin, en kapan tiada nantie goewa bakar ini tempat, Boensoe kata sama Pouhian: kita kaloe tiada kasie ini tempat, nantie dia bakar, lebie bae kita koentjie ini pintoe, sebab Koan Im Hoetbo orangnja sabar tiada begitoe maoe ladennin sama dia, kita kloewar die pintoe blakang naek die langit mengadoe sama Toehan, kita kata Wakong soeda reboet kita poenja tempat, abis bitjara, koentjie itoe pintoe, kloewar die pintoe blakang lantas naek die langit, en Wakong makie-makie die loewar sampe setengari'an tiada orang kloewar, en mara kloewarin dia poenja toembak Kimto poekoel itoe pintoe terboeka en masoek die dalem liat tiada ada satoe orang, tiada taoe ini 2 wesio kemana, en Wakong pikir tentoe dia naek kelangit mengadoe sama Toehan, Toehan tentoe mara soeros orang die langit dateng, kita mistie djaga lebie doeloe.
