Halaman:Lamijoe Wakong.pdf/35

Dari Wikisumber bahasa Indonesia, perpustakaan bebas
Halaman ini tervalidasi

33

atie boeat pikiran sama loe, en ini arie siapa njang adjak loe naek die langit? menjaoet Wakong kata: saija pegie dari sini, tiada tempat boeat tingal, diadie saija toeroen die doenia, sampe die Goenoeng nama Tiauw Tjinsan Anggioksie, saija bergoeroe sama Hwe IJam Ong Konghoet boeat moerit, abis Soehoe maoe naek die langit adjak sama saija, djadie saija bole dateng die sini ketemoe sama ma bapa, en ma bapanja kata: kapan arie loe berbantahan sama Teng Hoa en dia soeda mengadoe sama Toehan, Toehan soeda mara soeroe Kimto Taij Tjoe koempoelin orang-orangnja maoe tangkep sama loe sekarang, djangan kloewar, nantie Toehan dapet taoe, loe menginap 1 malem sadja, loe lantes toeroen lagie die doenia djangan soepaija Toehan dapet taoe loe ada die sini nantie djadie soesa, menjaoet Wakong kata: ma bapa djangan kwatir, saija taoe, en Wakong pikir itoe Taij Tjoe maoe koempoelin orang boeat tangkep sama kita, lebie bae kita doeloein phie djadie orang tingie besar masoek djadie dia poenja orang, kapan dia trima en kita lantes potong sama dianja, baroe kita toeroen lárie die doenia, en Wakong tiada kasie taoe sama ma bapanja ini perkara, en Wakong bilang sama bapanja dia kata maoe tjarie Soehoenja, Wakong lantes kloewar phie djadie 1 orang besar dan tingie, pegang toembak, pegie sama Kimto Taij Tjoe, maka die tanja: kau siapa nama? Wakong kata: hamba nama Tan Sam Long, Taij Tjoe liat ini Tan Sam Long beginie tingie den besar, Taij Tjoe soeka atie, Taij Tjoe kata: kau nantie laen arie goewa bilang sama Toehan bole naek pangkat, belon abis bitjara, ini Wakong soeda kloewarin dia poenja toembak maoe toembak ini Taij Tjoe, orang orangnja Taij Tjoe awa takoet, en ini Taij Tjoe liat dia Lamijoe Wakong.