— 43 —
badannja tida merasa sakit lagi, dan sesoedahnja satoe boelan, ia djadi baik betoel, membikin itoe doctor-doctor jang tadinja rasa tida bisa menoeloeng pada itoe njonja, djadi merasa heran dari kemandjoerannja obat oewab air.
No. 25.
Toelang belakang bengkok.
Satoe Nona oemoer 14 taoen dapat sakit djengkering (roodvonk), jang sesoedahnja diobati oleh doctor, kelihatan penjakit itoe soedah semboeh, tetapi Nona itoe lantas djadi bengkok kesebelah kiri, pahanja ketarik keatas lebih tinggi dari jang sebelah kanan, sedang toelang belakang dan tangannja toeroet ketarik, badan itoe kelihatan djadi bengkok amat sangat.
Doctor jang mengobati itoe Nona advies moesti dipotong, sebab kaloe tida, ia tida sanggoep bikin semboeh, tetapi orang toeahnja itoe anak tida soeka, karena bekas pemotongan bisa mengadakan tjatjat, hanja lantas bawa anak itoe pada toean Kuhne.
Toean Kuhne kasi keterangan, penjakitnja itoe Nona ada dari roodvonk jang doeloe beloem semboeh, hanja masih ada mengeram didalam badannja, sebab beloem keloear sama sekali lantas ditahan oleh obat-obatan, maka kotorannja djadi lantaran badan itoe lantas bengkok. Djikaloe melakoekan permandian, penjakit jang lama itoe moesti timboel kombali atau nanti toemboeh bisoel ditangan, kaloe ini soedah djadi petjah baroe anak itoe djadi semboeh sendirinja.
Setelah itoe Nona melakoekan permandian rendaman peroet dari doea sampe ampat kali saban hari mengimbangin panasnja badan, pada minggoe jang pertama bengkak ditangannja djadi koerangan, tapi penjakitnja tida kelihatan ada moendoer, dan sesoedahnja 14 hari, sakit ditangannja djadi bertambah, daging dibagian lengannja djadi keras, tanda disitoe bakal timboel bisoel, maka di itoe bagian lantas dipermandiin dengan tangas satoe doea kali saban hari, tapi oleh karena Nona itoe ada lembek, permandian tangas itoe tida diteroeskan, hanja diganti dengan kompres air panas teroes-teroesan, saban setengah djam diganti, soepaja selaloe angat.
Pada hari keampat dari minggoe jang ketiga, lengannja lantas timboel tiga bisoel, jang tida berapa lama djadi petjah.
