- 24 -
Dengan berdoedoek begitoe, djikaloe jang bermandi iloe ada seorang lelaki, kemaloeannja tentoe tergantoeng ke dalam air, djikaloe tida begitoe, maka doedoeknja moesti diatoer sampe kemaloeannja bisa tergantoeng kedalam air dengan betoel, sebab ini jang paling perloe.
Apabila jang bermandi itoe kemaloeannja ada berkoeloep (koelit jang menoetoepi kepala kemaloean), perloe koeloep itoe diboeka, ditarik dengan djari tangan dan pegang djangan sampe tertoetoep didalam rendaman, kemoedian dengan tangan jang lain orang moesti gosok dengan pelahan-pelahan kepala kemaloean itoe, tetapi menggosoknja moesti didalam air, tida boleh diloear air permandian itoe.
Djikaloe jang bermandi itoe ada orang perempoean, tentoe kemaloeannja tida bisa terendam didadalam, maka perloe moesti goenakan itoe blik petroleum jang pake lobang soeloeran karet, boeat koetjoerkan air disebelah loear kemaloeannja, (tida boleh digosok).
Blik petroleum jang berisi air itoe tentoe perloe ditaroek ditempat jang lebih tinggi, soepaja airnja bisa mengalir menoeroet sepandjang itoe soeloeran karet, lobang air itoe dibikin ketjil sadja, sekedar perloe boeat membikin basah kemaloeannja.
Djikaloe kamar mandinja ada berhoeboeng dengan waterleiding blik itoe tida perloe dipake, sebab soeloeran karet itoe boleh dihoeboengkan pada kran waterleiding sadja.
Orang perempoean jang melakoekan ini permandian, pantatnja tentoe toeroet basah terkena air, tapi ini tida djadi apa, asal sadja dibagian badan jang lain tida toeroet basah.
Orang perempoean jang selagi kain kotor (tjoetji kain atau datang boelan) dilarang keras melakoekan permandian ini.
Baikpoen boeat orang lelaki, maoepoen boeat orang perempoean, lamanja permandian ini terserah pada jang mendjalani, apa ia bisa tahan lama atau, tida, tapi paling lekas moesti 10 minuut dan paling lama satoe djam, jaitoe: sampe antero badan berasa dingin.
Permandian ini boleh dilakoekan sampe tiga kali satoe hari, pada waktoe dan djam jang tida ditentoekan, menoeroet soekanja jang melakoekan.
